Foliis ellipticis obtusiuscule vel acute acuminatis basi obtusis vel acutis supra glabriusculis subtus petiolis ramulisque pilis minimis adpressis pubescentibus, spiculis petiolo subaequalibus, rhachi pilosa; Sepalis 6-4 subulato-lanceolatis, anticis denticulatis; Fructu subgloboso costato passim piloso.
In prov. Rio Negro prope Barra (Spruce anno 1851, n. 1844 in h. DC., Boiss., Mart.). Petioli 3 lin. longi. limbi 4-5 poll. longi, 15-20 lin. lati, non pellucidi, in sicco pallidi, pube brevissima ad lentem etiam in adultis videnda. Spiculae 2-5, lineas 3-6 longae, pubescentes; Flores magis quam in aliis sp. distincti. Bractea obtusa, medio brevissime mucronata (minus quam in ic. cit.); Sepalum anticum bracteam vix superans, lateralia similia margis denticulata (nec integra ut in ic.), posticum minus; Fructus 3 lin. longus. (v.s.)
